काठमाडौं– सार्वजनिक ऋण व्यवस्थापन कार्यालयले सरकारी ऋण जुटाउन दुई प्रकारका बचतपत्र बिक्रीका लागि खुला गरेको छ । कार्यालयले रु. २ अर्ब ५० करोडको ‘नागरिक बचतपत्र-२०८७’ र रु. ५० करोडको ‘वैदेशिक रोजगार बचतपत्र-२०८७’ जारी गर्दैछ ।
यी दुवै पाँच वर्षे बचतपत्र खरिदका लागि मंसिर २५ गतेसम्म आवेदन दिन सकिनेछ र मंसिर २८ गते निष्कासन हुनेछन् । नागरिक बचतपत्रमा ६.५ प्रतिशत र वैदेशिक रोजगार बचतपत्रमा ७.५ प्रतिशत वार्षिक ब्याज पाइनेछ ।
ब्याज हरेक ६/६ महिनामा खरिदकर्ताको बैंक खातामा जम्मा हुनेछ । न्यूनतम रु. १० हजार र अधिकतम कुल निष्कासित रकम नबढ्ने गरी रु. १० हजारले भाग गर्दा निःशेष भाग जाने रकममा खरिद गर्न सकिनेछ ।
नागरिक बचतपत्र नेपाली र गैरआवासीय नेपालीले किन्न सक्नेछन् । वैदेशिक रोजगार बचतपत्र विदेशमा काम गर्ने वा फर्केको ६ महिना नपुगेका नेपाली, गैरआवासीय नेपालीले आफू वा परिवारको नाममा खरिद गर्न सक्नेछन् । डोम्स (DOMS) प्रणाली र इन्भेस्टर पोर्टलमार्फत आवेदन दिन सकिन्छ ।
विगतमा नागरिक बचतपत्र पूर्ण बिक्री हुने तर वैदेशिक रोजगार बचतपत्रमा कम चासो देखिने गरेको छ । लगानीकर्तालाई बचतपत्रबारे जानकारी अभावले कम खरिद हुने गरेको कार्यालयका उपसचिव प्रकाश पुडासैनीले बताए ।
“बचतपत्र के हो, किन र कसरी लगानी गर्ने भन्ने धेरैलाई थाहा छैन । खरिदकर्ता बढ्दै गए पनि अझै धेरैलाई जानकारी पुगेको छैन,” उनले भने ।
पछिल्लो चार दिनमा मात्र नागरिक बचतपत्रका लागि रु. ८० करोडको आवेदन परेको छ । यो वर्ष तोकिएको समयअगावै बिक्री सकिने अनुमान छ । पहिले आवेदन दिनेले पहिले पाउने गरी ‘स्टक’ रूपमा जारी हुन्छ ।
बचतपत्रको ब्याज बैंक मुद्दतीभन्दा आकर्षक रहेको र यो सुरक्षित, सहज तथा राम्रो प्रतिफल दिने सरकारी उपकरण भएको पुडासैनीले बताए । “घरजग्गा, सुन, सेयर, मुद्दतीजस्ता विकल्पभन्दा बचतपत्र सुरक्षित छ,” उनले भने ।
बचतपत्रमा सरकारले मूलधन ग्यारेन्टी गर्छ । ब्याज हरेक ६ महिनामा खातामा आउँछ । धितो राखेर ऋण लिन सकिन्छ । दोस्रो बजारमा सजिलै बिक्री हुन्छ र बैंकहरूले किन्नैपर्ने व्यवस्था छ । यसैले तत्काल नगदमा बदल्न सकिन्छ ।
