काठमाडौं, साउन २३ । जानकी फाइनान्स लिमिटेडले गत आर्थिक वर्ष (आव)को चौथो त्रैमासिक वित्तीय विवरण सार्वजनिक गरेको छ । उक्त वित्तीय विवरणअनुसार कम्पनी गत आवको चौथो त्रैमाससम्ममा रू. १३ करोड ७१ लाख घाटामा रहेको छ ।
अघिल्लो आवको सोही अवधिमा कम्पनी रू. ४१ लाख ४८ हजार नाफामा थियो । गत आवमा कम्पनीको इम्पेयरमेन्ट चार्ज बढेकाले कम्पनी नोक्सानीमा गएको हो । अघिल्लो वर्ष कम्पनीको इम्पेयरमेन्ट चार्ज रू. १२ करोड ४० लाख रहेकोमा गत आवमा बढेर रू. २१ करोड १८ लाख भन्दा बढी पुगेको छ ।
त्यस्तै कम्पनीको खुद ब्याज आम्दानी अघिल्लो वर्षको तुलनामा गत वर्ष २९ दशमलव ६८ प्रतिशत घटेको छ । अघिल्लो वर्ष कम्पनीको खुद ब्याज आम्दानी रू. १६ करोड ८ लाख रहेकोमा गत आवमा घटेर रू. ११ करोड ३० लाखमा झरेको छ ।
कम्पनी घाटामा रहेसँगै प्रतिशेयर आम्दानी १९ रुपैयाँ ८७ पैसा ऋणात्मक छ । अघिल्लो वर्ष कम्पनीको प्रतिशेयर आम्दानी ६० पैसा धनात्मक थियो ।
गत वर्षको चौथो त्रैमाससम्ममा कम्पनीको प्रतिशेयर नेटवर्थ भने ५७ रुपैयाँ ८६ पैसा रहेको छ ।
कम्पनीको चुक्ता पूँजी रू. ६९ करोड ४ लाख छ । गत आवको चौथो त्रैमाससम्ममा कम्पनीले जगेडामा रू. ४३ करोड ९ लाख सञ्चिति गरेको छ भने रिटेन्ड अर्निङ रू. ७२ करोड १८ लाख ऋणात्मक छ ।
