काठमाडौं, भदौ ३ । अर्थमन्त्री विष्णुप्रसाद पौडेलले सेयर बजारमा देखिएको उत्साहलाई सरकारले मर्न नदिने, बरु अझ दिगो र स्थिर बनाउने उद्घोष गरेका छन् ।
नेपाल उद्योग वाणिज्य महासंघको आइतबार काठमाण्डौमा आयोजित एक कार्यक्रमलाई सम्बोधन गर्दै उनले बजारमा देखिएको उत्साहलाई दिगो बनाइराख्न आवश्यक संरचनागत, नीतिगत र प्रविधिगत सुधारका लागि सरकार कटिबद्ध रहेको समेत बताएका छन् ।
'सेयर बजार अहिले उत्साहित छ । हामीले भन्ने गरेका छौं, सेयर बजारको अर्थतन्त्रको एउटा ऐना हो । यसले अर्थतन्त्रको अवस्थालाई प्रतिबिम्बित गर्छ ।' पौडेलले भने-'सरकारले लिएको नीतिकै कारण बजार उत्साहित छ । हामी सेयर बजारमा आएको उत्साहलाई दिगो र स्थिर ढंगले अगाडि बढेको देख्न चाहन्छौं । त्यसका लागि गर्नुपर्ने सबैखालका सुधारहरुमा सरकारको ध्यान गएको छ ।'
"सरकारले लिएको नीतिकै कारण बजार उत्साहित छ । हामी सेयर बजारमा आएको उत्साहलाई दिगो र स्थिर ढंगले अगाडि बढेको देख्न चाहन्छौं । त्यसका लागि गर्नुपर्ने सबैखालका सुधारहरुमा सरकारको ध्यान गएको छ । "
उनले सेयर बजारप्रति आफ्नो र अर्थमन्त्रालयको विशेष ध्यान गएको उल्लेख गर्दै थपे-'बजार दिगो हुनुपर्छ । तर योसँग सँगै लगानीकर्ता डूब्नुहुन्न, कर्नरिङजस्ता विकृतिहरु बजारमा हुनुहुन्न । यस सम्बन्धी आएका सुझावप्रति हामी गम्भीर छौं । हामी यस्ता समस्याहरुको समेत समाधानसहित अगाडि बढ्नेछौं ।'
उनले सरकारको पहलकदमी र लिएको लचक नीतिका कारण सेयर बजारमा मात्र नभई अर्थतन्त्रका अन्य क्षेत्रमा समेत उत्साह देखिएको दाबी गरे । उदाहरण प्रस्तुत गर्दै उनले अगाडि भने-' सरकारले प्राप्त गर्ने राजश्व गत साउनको तुलनामा २०८१ साउनमा २०.१ प्रतिशतले बढेको छ । पूँजीगत खर्च गत साउनको तुलनामा ९ गुणाले बढेको छ । शिथिल रहेको घरजग्गा कारोबारमा पनि गत साउनको तुलनामा यो साउनमा ११ प्रतिशतको बढोत्तरी देखिएको छ। घरजग्गा क्षेत्रबाट प्राप्त हुने राजश्व समेत बढेको छ ।'
उनले समग्र अर्थतन्त्रमा आएको सकारात्मक परिवर्तनलाई जनताले सरकारप्रति गरेको विश्वास तथा सरकारले गरेका निर्णयहरुको प्रभावको रुपमा समेत अथ्र्याएका छन् ।
उनले सेयर बजार र अर्थतन्त्रका अन्य क्षेत्रमा देखिएको सुधार पर्याप्त नभएको भन्दै यसमै चित्त बुझाएर सरकार नबस्ने समेत उद्घोष गरेका छन् । 'हामीलाई तीव्र गतिको प्रगति चाहिएको छ । आर्थिक षेत्रमा देखिएका समस्याको शीघ्र समाधान चाहिएको छ । सरकारले यी सबै विषयलाई महत्व दिएर आफ्नो काम गर्छ ।' उनले भने-'हामी निजी क्षेत्रको मनोबल बढाउने गरी अगाडि बढिरहेका छौं । अहिलेको सरकार निजी क्षेत्रको अभिभावकको भूमिकामा छ । तपाईहरुले कुनै असहज महसुस गर्नुपर्दैन ।'
