काठमाडौँ । आईएमई लाइफ इन्स्योरेन्स कम्पनी लिमिटेडले आजदेखि सजिलो ई-लोन सेवा सुरु गरेको छ । कम्पनीका सञ्चालक समिति तथा उच्च ब्यवस्थापनको उपस्थितिमा अध्यक्ष डा. रामहरी अर्यालले ई-लोन सेवा उद्घाटन गरेका हुन् ।
सो अवसरमा अध्यक्ष अर्यालले घरबाटै बिमित (पोलिसी होल्डर)ले ऋणको लागि आवेदन दिन र ऋण प्राप्त गर्न सक्ने सुविधा उपलब्ध गराएको बताए ।
सो सेवा अन्तर्गत बिमितले घरबाटै आइएमई लाइफ मोवाइल एप www.imelifeinsurance.com का माध्यमबाट ५ हजार रुपैयाँदेखि एक लाख रुपैयाँसम्म ई-लोनको लागि आवेदन दिन सक्नेछन् ।
बिमितले कम्पनीको वेबसाइटमार्फत ऋण आवेदन चौबिसै घण्टा आफू रहेको स्थानबाटै दिन सक्नेछन् भने कार्यालय समय भित्र तुरुन्तै र बिदाको दिन कार्यालय समय सुरु हुने बित्तिकै सजिलै ऋण आफ्नो बैंक खातामा प्राप्त गर्न सक्नेछन् ।
यसरी ऋण लिनको निमित्त कुनैपनि अतिरिक्त सेवा शुल्क लाग्ने छैन । ऋण सुविधा पाउनको लागि बिमितको केवाइसी प्रमाणीकरण पूरा हुनुको साथै बीमा शुल्क भुक्तानी गरेको कम्तिमा ३ वर्ष पूरा भइसकेको हुनुपर्ने छ ।
कम्पनीका प्रमुख कार्यकारी अधिकृत पवन कुमार खड्कले आइएमई लाइफ ई(लोन सेवाले कम्पनीका बिमितहरूलाई सरल र सहज कर्जा सेवा प्रदान गर्ने विश्वास लिएको बताउँदै डिजिटाइजेसन, अटोमेसन र द्रुतसेवा दिने कम्पनीको उद्देश्यमा निरन्तरता दिदै ग्राहक सेवा र अनुभवलाई थप परिष्कृत र उत्कृष्ठ बनाउदै लैजाने प्रयासको निरन्तरता भएको बताए ।
