काठमाण्डौ । सिद्धार्थ बैंक लिमिटेडको प्रमुख वित्तीय सूचकहरु सुदृढ बनेका छन् । बैंकले सार्वजनिक गरेको गत आवको. चौथो त्रैमाससम्मको अपरिष्कृत वित्तीय विवरणअनुसार बैंकको खुदा नाफा १०.२३ प्रतिशतले बढेको छ ।
बैंकले समीक्षा अवधिसम्म ३ अर्ब ३९ करोड रुपैयाँबराबरको खुद नाफा आर्जन गरेको छ । अघिल्लो आवको सोही अवधिसम्म भने बेंकले ३ अर्ब ८ करोड रुपैयाँ खुद नाफा आर्जन गरेको थियो । बैंकको खुद ब्याज आम्दानी पनि ६.४३ प्रतिशतले बढ्दै ८ अर्ब ४३ करोड रुपैयाँ पुगेको छ ।
यस्तै अघिल्लो आवमा १ अर्ब ४२ करोड रुपैयाँबराबर रहेको खुद शुल्क तथा कमिशन आम्दानी बढेर १ अर्ब ६४ करोड रुपैयाँ पुगेको छ । बैंकको खुद सञ्चालन आम्दानी ९ अर्ब ८४ करोड र सञ्चालन मुनाफा ५ अर्ब २ करोड रुपैयाँ रहेको छ ।
बैंकको वितरणयोग्य मुनाफामा उल्लेख्य सुधार आएको छ । बैंकको वितरणयोग्ण्य मुनाफा १ अर्ब ८६ करोड रुपैयाँ पुगेको छ । जुन अघिल्लो आवको सोही अवधिको तुलनामा २२०.९७ प्रतिशतले बढी हो । यस्तै बैंकको लाभांश क्षमता पनि ४.१२ प्रतिशतबाट बढेर १३.२२ प्रतिशत पुगेको छ ।
बैंकको प्रतिसेयर आम्दानी पनि २१.८६ प्रतिशतबाट बढेर २४.१० प्रतिशत कायम भएको छ । अघिल्लो आवमा २ खर्ब ४१ अर्ब रुपैयाँ रहेको बैंकको निक्षेप संकलन बढेर २ खर्ब ८० अर्ब पुगेको छ । निक्षेप संकलन पनि १ खर्ब ९५ अर्बबाट बढेर २ खर्ब १४ अर्ब पुगेको छ ।
खराब कर्जा अनुपात भने २.१७ प्रतिशतबाट बढेर २.६२ प्रतिशत पुगेको छ । यो अवधिमा बैंकको रिटेन्ड अर्निङ २२०.९७ प्रतिशतले बढेर १ अर्ब ८६ करोड रुपैयाँ पुगेको छ । रिजर्भको आकार पनि १३ अर्ब ३९ करोड रुपैयाँबाट बढेर १५ अर्ब ४ करोड पुगेको छ ।
समीक्षा अवधिसम्म बैंकको प्रतिसेयर नेटवर्थ २१९.९७ रुपैयाँ, प्रतिसेयर कुल सम्पत्तिको मूल्य २ हजार ४०४.४ रुपैयाँ, मूल्य आम्दानी अनुपात १५.९३ गुणा र तरलता अनुपात ३४.०१ प्रतिशत कायम भएको छ ।
