हिमालयन डिष्टिलरी लिमिटेडले चालु आर्थिक वर्ष २०८२/८३ को पहिलो त्रैमासिक अपरिष्कृत वित्तीय विवरण सार्वजनिक गरेको छ। विवरणअनुसार कम्पनीको खुद नाफा ५४.६१ प्रतिशतले ह्रास भई रू. ९ करोड २ लाखमा सीमित भएको छ। अघिल्लो आर्थिक वर्षको सोही अवधिमा कम्पनीले रू. १९ करोड ८८ लाख खुद नाफा आर्जन गरेको थियो।

बिक्री आम्दानीमा आएको उल्लेखनीय कमीले नाफामा प्रत्यक्ष असर पारेको देखिन्छ। असोज मसान्तसम्म कम्पनीको कुल बिक्री आम्दानी २७.६४ प्रतिशतले घटेर रू. १ अर्ब ७ करोडमा खुम्चिएको छ। गत वर्ष सोही अवधिमा यो रकम रू. १ अर्ब ४८ करोड रहेको थियो।

नाफा र बिक्रीमा आएको गिरावटसँगै प्रतिशेयर आम्दानी (EPS) पनि घटेर रू. ११.७५ कायम भएको छ, जुन अघिल्लो वर्ष रू. १८.०२ थियो। कम्पनीको प्रतिशेयर नेटवर्थ रू. १३८.०४ रहेको छ भने मूल्य आम्दानी अनुपात (P/E Ratio) १११.५२ गुणा पुगेको छ।

हाल कम्पनीको चुक्ता पूँजी रू. ३ अर्ब ७ करोड ३४ लाख छ भने जगेडा कोषमा रू. १ अर्ब १८ करोड सञ्चित छ।

समग्रमा, बिक्री आम्दानी र नाफामा आएको ठूलो ह्रासले हिमालयन डिष्टिलरीको वित्तीय प्रदर्शनमा दबाब देखिएको छ।