काठमाडौं । न्यादी हाईड्रोपावर लिमिटेडको घाटा थप बढेको छ । कम्पनीले चालु आर्थिक वर्षको पहिलो त्रैमाससम्म ७६ लाख ९७ हजार रुपैयाँ घाटा व्यहोरेको छ, जबकि अघिल्लो आर्थिक वर्षको सोही अवधिमा घाटा ७५ लाख ७५ हजार रुपैयाँ थियो ।
विद्युत् बिक्री आम्दानीमा १९.५८ प्रतिशतको गिरावट आएको छ । यस त्रैमासमा कम्पनीले विद्युत् बिक्रीबाट १७ करोड ३ लाख रुपैयाँ आर्जन गरेको छ, जुन गत वर्षको २१ करोड १९ लाख रुपैयाँको तुलनामा कम हो । कम्पनीले ३ लाख २९ हजार रुपैयाँ वित्तीय आम्दानी पनि हासिल गरेको छ । परियोजना सञ्चालन खर्च ७ करोड ४५ लाख रुपैयाँ र प्रशासनिक खर्च ७९ लाख ११ हजार रुपैयाँ रहेको छ ।
यद्यपि, वित्तीय खर्च भने घटेको छ । अघिल्लो वर्ष १४ करोड २४ लाख रुपैयाँ रहेको वित्त खर्च यस त्रैमासमा घटेर ९ करोड ५७ लाख रुपैयाँमा सीमित भएको छ ।
कम्पनीको चुक्ता पुँजी १ अर्ब ५० करोड रुपैयाँ छ । कुल चालु सम्पत्ति १५ करोड ८१ लाख रुपैयाँ र कुल चालु दायित्व २३ करोड ७१ लाख रुपैयाँ रहेको छ ।
समीक्षा अवधिसम्म कम्पनीको प्रतिसेयर आम्दानी (ईपीएस) ०.५१ रुपैयाँले ऋणात्मक, प्रतिसेयर नेटवर्थ ६७.४९ रुपैयाँ र मूल्य–आम्दानी अनुपात (पीई रेसियो) १७६.९४ गुणा कायम भएको छ ।
