काठमाडौं । राष्ट्रिय वाणिज्य बैंकले देशभरका शाखाका लागि ठूलो संख्यामा कर्मचारी माग गरेको छ। बैंकले आज सूचना जारी गर्दै रिक्त रहेका ६२ जना सहायक पदको लागि दरखास्त आह्वान गरेको हो।
देशका सातवटै प्रदेशमा रहेका बैंकका शाखाको लागि खुला तथा समावेशी प्रतियोगिताद्वारा कर्मचारीको पदपूर्ति गर्न लागिएको सूचनामा उल्लेख छ। यसका लागि कम्तीमा प्लस टू गरेको र लोक सेवा आयोगले गत कात्तिक १५ गते सञ्चालन गरेको पूर्व योग्यता परीक्षा उत्तीर्ण गरेको हुनु पर्नेछ। उमेरको हकमा १८ वर्ष पूरा भई २५ वर्ष ननाघेको हुनु पर्नेछ। योग्यता पुगेका इच्छुक नेपालीले आजदेखि अनलाइन दरखास्त दिन सक्नेछन्।
तोकिएको अन्य योग्यता भएको इच्छुक व्यक्तिले फागुन २१ गतेसम्म र दोब्बर दस्तूर तिरी फागुन २८ गतेसम्म अनलाइन मार्फत आवेदन दिन सक्नेछन्। लिखित परीक्षा लोक सेवा आयोगसँग समन्वय गरी सम्बन्धित प्रदेशका तोकिएको स्थानमा सञ्चालन गरिने बैंकले जानकारी दिएको छ।
हेर्नुहोस् सूचना
