काठमाडौँ / महालक्ष्मी विकास बैंकले डिजिटल कारोबार प्रवर्द्धन, ग्राहक सुविधा अभिवृद्धि तथा सुरक्षित र नगदरहित बैंकिङ कारोबारलाई बढावा दिन ‘महालक्ष्मी महा सोमबार’ योजना सञ्चालनमा ल्याएको छ ।
यस योजनाअन्तर्गत महालक्ष्मी विकास बैंकका डेबिट तथा क्रेडिट कार्डवाहक ग्राहकले हरेक सोमबार दराजमार्फत अनलाइन सामान खरिद गर्दा विशेष छुट प्राप्त गर्न सक्नेछन् ।
बैंकका डेबिट कार्ड लिएका ग्राहकले दराज नेपालमार्फत न्यूनतम रु. १,९९९ बराबरको सामान खरिद गर्दा १० प्रतिशत वा अधिकतम रु. ७५० सम्मको छुट प्राप्त गर्नेछन् । त्यस्तै, क्रेडिट कार्ड लिएका ग्राहकले न्यूनतम रु. १,९९९ बराबरको सामान खरिद गर्दा १५ प्रतिशत वा अधिकतम रु. १,००० सम्मको छुट पाउनेछन् ।
यो योजना हरेक सोमबार मात्र लागू हुनेछ । छुट सीमित संख्यामा तथा पहिले आउनेलाई प्राथमिकताका आधारमा उपलब्ध हुने भएकाले ग्राहकले हरेक सोमबार समयमै यस योजनाको लाभ लिन सक्ने बैंकले जनाएको छ ।
यस प्रकारको योजनामार्फत बैंकले आफ्ना ग्राहकलाई डिजिटल भुक्तानी तथा कार्डमार्फत हुने कारोबारमा थप प्रोत्साहित गर्दै आधुनिक बैंकिङ सेवाको प्रयोग विस्तार गर्न सहयोग पुग्ने विश्वास लिएको छ । साथै, दैनिक कारोबारमा ग्राहकलाई थप सुविधा, बचत तथा मूल्य अभिवृद्धि प्रदान गर्न योजना सहयोगी हुने बैंकले जनाएको छ ।
गुणस्तरीय वित्तीय सेवा प्रदान गर्दै आएको महालक्ष्मी विकास बैंकले हालै काठमाडौंको ज्ञानेश्वरमा कफी लाउन्जसहितको डिजिटल हब सञ्चालनमा ल्याएको छ ।
