काठमाडौं, जेठ १८ । नेपाल राष्ट्र बैंकले शुक्रबार पनि २५ अर्ब रुपैयाँ तरलता प्रशोचन गर्ने भएको छ ।
बिहीबार मात्रै केन्द्रीय बैंकले बैंकिङ प्रणालीबाट ५० अर्ब प्रशोचन गरेको केन्द्रीय बैंकले दोस्रो दिन पुनः २५ अर्ब रुपैयाँ तान्न लागेको हो ।
निक्षेप संकलन उपकरणमार्फत सात दिने अवधिका लागि २५ अर्ब रुपैयाँ प्रशोचन गर्न लागिएको केन्द्रीय बैंकले सूचनामार्फत उल्लेख गरेको छ । पछिल्लो समय बैंकिङ्ग क्षेत्रमा बढ्दो निक्षेपको तुलनामा कर्जा लगानी हुन नसक्दा तरलता अत्यधिक छ । गत जेठ १५ गतेसम्ममा बैंक तथा वित्तीय संस्थाहरूले कुल ६२ खर्ब ६अर्ब रुपैयाँ निक्षेप संकलन गरेर ५१ खर्ब २० अर्ब रुपैयाँ मात्र कर्जा लगानी गरेका छन् ।
समीक्षा अवधिसम्ममा बैंकमा ५ खर्ब रुपैयाँभन्दा बढी लगानीयोग्य रकम छ । बैंकहरुसँग पर्याप्त तरलता रहेका कारण अन्तर बैंक ब्याजदर पनि २.९६प्रतिशतमा झरेको छ । त्यस्तै ट्रेजरी बिलको ब्याजदरसमेत अधिकतम ३.२० प्रतिशतमा खुम्चिएको छ ।
पछिल्लो समयमा केन्द्रीय बैंकले रिभर्स रिपो उपकरणमार्फत लगातार बैंकिङ प्रणालीमार्फत तरलता प्रशोचन गरिरहेको छ ।
