काठमाडौ, २१ फागुन । एमालेका अध्यक्ष केपी शर्मा ओलीले कांग्रेसका सभापति शेरबहादुर देउवालाई प्रधानमन्त्री बन्न प्रस्ताव गरेका खुलेको छ । तर, त्यस्तो प्रस्तावलाई देउवाले नै बेवास्ता गरेको बुझिएको छ ।
कांग्रेस स्रोतका अनुसार, देउवालाई एमालेको समर्थनमा सरकारको नेतृत्व गर्न ओलीले प्रस्ताव गरेका थिए । उक्त प्रस्तावमा देउवाले सकारात्मक प्रतिक्रिया नदिएको जानकारी शेखर कोइरालाले पाएका थिए ।
कोइरालाले समेत देउवालाई ओलीसँग कुरा गर्न आग्रह गरेका थिए । तर, देउवाले गठबन्धनमा अविश्वास हुने भन्दै कुरा गर्नसमेत अस्वीकार गरेको कांग्रेस स्रोतको भनाइ छ ।
राजनीतिक दलका नेताबीच भेटघाट हुनु उपयुक्त हुन्छ भनी नेताहरुले कर गर्दा समेत देउवाले गठबन्धनमा अविश्वास बढ्ने टिप्पणी गरेका थिए । “कतिसम्म भने भाउजू (आरजु देउवा) ले भेट्छु भन्दासमेत देउवाले भेट्न जान दिनुभएन,” स्रोतले भन्यो ।
छोराको बिबाहको निम्ता कार्ड दिने बहानामा आरजुले दुईघण्टा ओलीसँग कुराकानी गरेकी थिइन् । फोनमा कुरा गर्नुस् भन्दा पनि देउवाको भनाइ हुन्थ्यो, “हल्ला हुन्छ, गठबन्धनमा अविश्वास बढ्छ ।”
ओलीले भेट्न, कुरा गर्न खोज्दा आफूले टारेको कुरा सोमबार पदाधिकारी बैठकमै देउवाले खुलाएका छन् । “ओलीजीले भेटौँ भन्दै दिनमा दुई पटक फोन गर्दा गठबन्धनमा अविश्वास बढ्छ भनेर भेट्न मानिनँ,” देउवाले पदाधिकारी बैठकमा भनेका थिए, “तर, प्रचण्डले लुकीलुकी ओलीलाई भेद्दा रहेछन् । उनी त धोकेबाज रहेछन् ।”
एमालेका उपमहासचिव विष्णु रिमालले मध्यपहाडी पुष्पलाल राजमार्गको यात्राबाट फर्किएपछि बाह्रखरीसँगको कुराकानीमा कांग्रेस सभापति देउवाले राजनीतिक विषयमा एमालेसँग कुरा गर्न नचाहेको बताएका थिए ।
सत्ता र नागरिकमा मुद्दामा जिम्मेवार राजनीतिक दलबीच सहकार्य हुन नसकेको उल्लेख गर्दै रिमालले कांग्रेससँग किन सहकार्य गर्नुहुन्न भन्ने प्रश्नमा यस्तो जवाफ फर्काएका थिए ।
“हामीले निर्वाचनमा ‘झ्यास’ दलहरुलाई नबोकौँ, मैत्रीपूर्ण प्रतिस्पर्धा गरौँ भन्दा कांग्रेस तयार भएन र गठबन्धनमा चुनावमा गयो,” रिमालले भनेका थिए, “राष्ट्रको अर्थतन्त्रदेखि धेरै कुरा समस्याग्रस्त छन् । यी सबै कुरा मिलेर गरौँ भन्यौं देउवाजी कुरा गर्न तयार हुनुहुन्न ।”
एमालेले देशको अवस्था सुधार गर्दै आगामी चुनावमा मैत्रीपूर्ण प्रतिस्पर्धा गर्नेगरी सत्ता सहकार्यको प्रस्ताव गरेका थिए ।
स्रोतका अनुसार, देउवा र ओलीसँग उस्तै सम्बन्ध भएका एक गैर राजनीतिक व्यक्तिले ओली देउवाबीच सन्देश आदान–प्रदान गरेका थिए । तर, देउवा भने प्रचण्डले संवाद मात्र थाहा पाए पनि गठबन्धन नै तोडिने भन्दै कुराकानीसमेत खुलेर गर्न तयार भएका थिएनन् ।
एमालेले कोसी प्रदेश मुख्यमन्त्री निर्वाचनमा शेखर–गगन समूहसँग सहकार्य गरेको थियो । तर, महत्वपूर्ण निर्णयमा देउवाबाटै प्रभावित हुने भएपछि देउवासँगै सिधा संवाद गर्न खोजेको थियो ।
“शेखर–गगन समूह कांग्रेसभित्र विद्रोही त देखियो तर, परेको बेला निर्णय गर्न सक्ने अवस्थामा देखिएन,” एमालेका एक पोलिट्व्यूरो सदस्यले भने, “त्यसैले देउवासँगै सिधा कुरा गरौं भन्ने नीति बनाइयो, उहाँ त कुरा गर्नसमेत तयार हुनुभएन ।”
ती नेताले केही शक्ति राष्ट्रको प्रभावमा देउवा एमलेसँग कुराकानी गर्न तयार नभएको आरोपसमेत लगाए । एमाले–माओवादी गठबन्धन निर्माणमा भने उनले शक्ति राष्ट्रको प्रभाव परेको विषय अस्वीकार गरे ।
