काठमाडौँ । ग्लोबल आइएमई बैंक लिमिटेडले आफ्नो १८औँ वार्षिकोत्सव र विश्व वातावरण दिवसको अवसरमा काठमाडौँको टोखा नगरपालिका र खोटाङको दिक्तेल रुपाकोट मझुवागढी नगरपालिकामा वृक्षारोपण कार्यक्रम सम्पन्न गरेको छ।
टोखामा फलफूलका बिरुवा रोपण
बैंकले टोखा नगरपालिकाका विभिन्न विद्यालयहरूमा १,००० फलफूलका बिरुवा रोपेको छ। कार्यक्रममा टोखा नगरपालिकाका मेयर प्रकाश अधिकारी, बैंकका प्रमुख कार्यकारी अधिकृत सुरेन्द्रराज रेग्मी, विद्यालयका प्रधानाध्यापक, प्रतिनिधि, विद्यार्थी र स्थानीयवासीको सहभागिता थियो।
दिक्तेलमा बाँसका बिरुवा रोपण
यस्तै, दिक्तेल रुपाकोट मझुवागढी नगरपालिकाका विभिन्न वडाहरूमा १,५०० बाँसका बिरुवा रोपिएको छ। उक्त कार्यक्रममा खोटाङका प्रमुख जिल्ला अधिकारी, जिल्ला समन्वय समिति प्रमुख, नगरपालिका प्रमुख, नेपाली सेना, नेपाल प्रहरीका जिल्ला नेतृत्व, प्रतिनिधि र स्थानीयवासीको उल्लेख्य उपस्थिति थियो।
१८,००० बिरुवा रोपणको लक्ष्य
बैंकले यस आर्थिक वर्षमा मुलुकभर १८,००० बिरुवा रोपण गर्ने लक्ष्य लिएको छ। सातै प्रदेशका विभिन्न स्थानमा वृक्षारोपण कार्यक्रम सञ्चालन भइरहेको छ। यी कार्यक्रमले जलवायु परिवर्तन न्यूनीकरण र स्थानीयको आयआर्जनमा सहयोग पुग्ने बैंकको विश्वास छ।
