काठमाण्डौ । चालु आर्थिक वर्ष २०८२/८३ को असोज मसान्तसम्म बैंक तथा वित्तीय संस्थाहरूमा निक्षेप ३.० प्रतिशतले वृद्धि भएको छ । पहिलो त्रैमासमा निक्षेप संकलन २ खर्ब १८ अर्ब ७२ करोडले बढेर कुल ७४ खर्ब ८२ अर्ब ५९ करोड पुगेको छ । अघिल्लो वर्षको सोही अवधिमा निक्षेप २.६ प्रतिशत (१ खर्ब ७० अर्ब) ले बढेको थियो ।
वार्षिक बिन्दुगत आधारमा २०८२ असोज मसान्तमा कुल निक्षेपमा चल्ती, बचत र मुद्दती निक्षेपको अंश क्रमशः ६.४ प्रतिशत, ३८.७ प्रतिशत र ४६.४ प्रतिशत रहेको छ । अघिल्लो वर्ष सोही अवधिमा यी अंश क्रमशः ५.४ प्रतिशत, ३२.७ प्रतिशत र ५४.८ प्रतिशत थिए । यस अवधिमा निक्षेप १३.० प्रतिशतले बढेको छ ।
२०८२ असोज मसान्तमा कुल निक्षेपमा संस्थागत निक्षेपको अंश ३५.३ प्रतिशत छ, जुन २०८१ असोज मसान्तमा ३५.८ प्रतिशत थियो ।
कर्जा प्रवाह
समीक्षा अवधिमा निजी क्षेत्रतर्फ कर्जा प्रवाह १.५ प्रतिशत (८२ अर्ब ९३ करोड) ले बढेर ५५ खर्ब ८० अर्ब ६४ करोड पुगेको छ । अघिल्लो वर्ष सोही अवधिमा कर्जा २.५ प्रतिशत (१ खर्ब २८ अर्ब ६५ करोड) ले बढेको थियो ।
वार्षिक बिन्दुगत आधारमा २०८२ असोज मसान्तमा निजी क्षेत्रतर्फ कर्जा ७.३ प्रतिशतले बढेको छ । यसमा गैर–वित्तीय संस्थागत क्षेत्रको अंश ६२.८ प्रतिशत र व्यक्तिगत तथा घरपरिवार क्षेत्रको अंश ३७.२ प्रतिशत छ । अघिल्लो वर्ष यी अंश क्रमशः ६४.० प्रतिशत र ३६.० प्रतिशत थिए ।
समीक्षा अवधिमा वाणिज्य बैंकहरूको कर्जा १.६ प्रतिशत, विकास बैंकहरूको ०.५ प्रतिशत र वित्त कम्पनीहरूको १.६ प्रतिशतले बढेको छ ।
बैंक तथा वित्तीय संस्थाहरूको लगानीमा रहेको कर्जामध्ये चालु सम्पत्ति (कृषि तथा गैर–कृषिजन्य) को सुरक्षणमा १५.० प्रतिशत र घरजग्गा धितोमा ६४.३ प्रतिशत छ । अघिल्लो वर्ष यी अंश क्रमशः १३.४ प्रतिशत र ६५.८ प्रतिशत थिए ।
आर्थिक वर्ष २०८२/८३ को तीन महिनामा विभिन्न क्षेत्रतर्फको कर्जा वृद्धि निम्नानुसार छः
- निर्माण क्षेत्र : २.९ प्रतिशत
- यातायात, सञ्चार तथा सार्वजनिक सेवा : २.४ प्रतिशत
- औद्योगिक उत्पादन : २.४ प्रतिशत
- उपभोग्य : १.६ प्रतिशत
- थोक तथा खुद्रा व्यापार : १.४ प्रतिशत
- सेवा उद्योग : ०.३ प्रतिशतले घटेको
कर्जाको प्रकारअनुसारः
- रियल स्टेट कर्जा (व्यक्तिगत आवासीय घर कर्जासमेत) : ३.२ प्रतिशत बढेको
- मार्जिन प्रकृतिको कर्जा : ३.० प्रतिशत
- क्यास क्रेडिट कर्जा : २.७ प्रतिशत
- आवधिक कर्जा : ०.७ प्रतिशत
- हायर पर्चेज कर्जा : ०.६ प्रतिशत
- ट्रष्ट रिसिट (आयात) कर्जा : ४.३ प्रतिशत घटेको
- अधिविकर्ष कर्जा : ३.३ प्रतिशत घटेको
