काठमाण्डौ । नेपाल राष्ट्र बैंकले चाँदी आयातका लागि विदेशी मुद्रा सटही सुविधामा नयाँ व्यवस्था लागू गरेको छ। केन्द्रीय बैंकले एकीकृत परिपत्र–२०८१ संशोधन गर्दै उद्योग तथा व्यवसायीलाई प्रदान गरिने सटही सीमामा परिवर्तन गरेको हो।
नयाँ व्यवस्थाअनुसार:
-
उद्योगहरू मासिक रूपमा अधिकतम २० लाख अमेरिकी डलर बराबरको सटही सुविधा लिन सक्नेछन्।
-
अन्य व्यवसायीहरू मासिक रूपमा अधिकतम ४ लाख अमेरिकी डलर बराबरको सुविधा प्राप्त गर्न सक्नेछन्।
यसअघि उद्योगलाई एकपटकमा ५ लाख अमेरिकी डलर र अन्य व्यवसायीलाई १ लाख अमेरिकी डलर बराबरको सटही सुविधा दिइँदै आएको थियो। संशोधनपछि एकपटकको सीमा हटाएर मासिक कोटा प्रणाली लागू गरिएको राष्ट्र बैंकले स्पष्ट पारेको छ।
राष्ट्र बैंकका अनुसार, यो नयाँ व्यवस्था चाँदी आयात प्रक्रियालाई व्यवस्थित बनाउने र विदेशी मुद्रा व्यवस्थापनलाई थप प्रभावकारी बनाउने उद्देश्यले ल्याइएको हो।
