जगदम्बा मोटर्स प्रा. लि. ले बुटवलमा आयोजना गरेको अपाचे रेस एक्सपेरियन्स (ARE) GP रेसिङ क्वालिफायर्सबाट १६० सीसी वर्गका तीन राइडर ग्रान्ड फिनालेका लागि छनोट भएका छन् ।
श्री गौराङ्ग इजी वे ट्रायल सेन्टर, तिलोत्तमा–५, कफी कम्पनी, मणिग्राम, बुटवलमा आयोजित क्वालिफायर्समा बुटवल क्षेत्रका उदीयमान राइडर, मोटरस्पोर्ट्सप्रेमी तथा एमेच्योर रेसरहरूको सहभागिता रहेको थियो । बुटवल क्षेत्रका लागि टीभीएसको आधिकारिक डिलर बालाजी अटोमोबाइल्ससँगको सहकार्यमा कार्यक्रम आयोजना गरिएको हो ।
क्वालिफायर्समा उत्साहजनक सहभागिता देखिएपछि ७६ जना सहभागी पुगेसँगै दर्ता प्रक्रिया रोक्नुपरेको आयोजकले जनाएको छ । सहभागीहरूले व्यावसायिक रेस प्रशिक्षण तथा प्रतिस्पर्धात्मक रेसिङमा सहभागिता जनाएका थिए ।
कार्यक्रममा पूर्व ARE GP नेपाल विजेता तथा मद्रास इन्टरनेसनल सर्किटका विजेता सुजन थापा मगर र ट्र्याक तथा टार्मेक रेसिङमा चार पटककी राष्ट्रिय च्याम्पियन नवाङ मोक्तानले सहभागीलाई प्रशिक्षण दिएका थिए ।
कार्यक्रममा राइडिङ पोस्चर, कर्नरिङ प्रविधि, लिनिङ, ब्रेकिङ र भिजन कन्ट्रोलसम्बन्धी सैद्धान्तिक कक्षा सञ्चालन गरिएको थियो । त्यसपछि राइडरहरूले प्रशिक्षकको निर्देशनमा अन–ट्र्याक ड्रिलमार्फत अभ्यास गरेका थिए ।
प्रशिक्षणपछि भएको १६० सीसी वर्गको प्रतिस्पर्धात्मक रेसबाट शीर्ष तीन राइडर छनोट भएका हुन् । जसमा धीरज बि.क. ३४.०७ सेकेन्डको समयसहित विजेता बने । अभिषेक पन्थी ३४.६२ सेकेन्डसहित प्रथम उपविजेता र अरिक श्रेष्ठ ३४.८७ सेकेन्डसहित द्वितीय उपविजेता बने ।
यी तीनै राइडरले ARE GP ग्रान्ड फिनालेमा बुटवलको प्रतिनिधित्व गर्नेछन् । ग्रान्ड फिनालेमा उनीहरूले काठमाडौं, नेपालगञ्ज, इटहरी र पोखराका शीर्ष क्वालिफायर्ससँग प्रतिस्पर्धा गर्नेछन् ।
क्वालिफायर्समा सहभागी सबैलाई प्रमाणपत्र वितरण गरिएको थियो । त्यसपछि विजेता तथा उपविजेतालाई मञ्चमा सम्मान गरिएको थियो ।
बालाजी अटोमोबाइल्सका प्रबन्ध निर्देशक विशाल जैसवालले बुटवलमा ७६ जनासम्मको सहभागिताले मोटरस्पोर्ट्सप्रति क्षेत्रको उत्साह देखाएको बताए । उनका अनुसार सहभागीमध्ये धेरै राइडर यसअघि ट्र्याकमा नउत्रिएका भए पनि राष्ट्रिय च्याम्पियनबाट प्रशिक्षण लिएर व्यावसायिक रेसरझैँ प्रतिस्पर्धा गरेका थिए ।
ARE GP को ग्रान्ड फिनालेमा १६० सीसी र २०० सीसी वर्गमा प्रथम स्थान हासिल गर्ने विजेताले भारतको मद्रास इन्टरनेसनल सर्किटमा हुने अन्तर्राष्ट्रिय रेसिङमा नेपालको प्रतिनिधित्व गर्नेछन् । त्यहाँ उनीहरूले ५० भन्दा बढी देशका राइडरसँग प्रतिस्पर्धा गर्नेछन् । सफल राइडरले आफ्नो वर्गमा थप अन्तर्राष्ट्रिय रेसिङमा सहभागी हुने अवसर पाउनेछन् ।
यात्रा तथा आवासको सम्पूर्ण खर्च जगदम्बा मोटर्स (टीभीएस नेपाल) र टीभीएस मोटर कम्पनी, भारतले व्यहोर्नेछन् ।
जगदम्बा मोटर्सले नेपालमा मोटरस्पोर्ट्स संस्कृति निर्माण गर्ने उद्देश्यसहित ARE GP सञ्चालन गर्दै आएको जनाएको छ । कार्यक्रमअन्तर्गत अपाचे ट्र्याक एक्सपेरियन्स, अपाचे रेसिङ क्वालिफायर्स र ARE GP ग्रान्ड फिनाले गरी तीन चरण रहेका छन् ।
अपाचे ट्र्याक एक्सपेरियन्सअन्तर्गत सतुङ्गलस्थित भेहिकल रिसर्च एन्ड ट्रेनिङ सेन्टरमा ७–८ वटा खुला प्रशिक्षण सत्र सञ्चालन हुनेछन् । त्यस्तै, अपाचे रेसिङ क्वालिफायर्स काठमाडौं, बुटवल, नेपालगञ्ज, इटहरी र पोखरामा गरी पाँच क्षेत्रमा आयोजना हुनेछन् ।
टीभीएस वान मेक च्याम्पियनसिपमा सहभागी नेपाली रेसरलाई जगदम्बा मोटर्स प्रा. लि. र टीभीएस मोटर कम्पनी, भारतले सहयोग गर्दै आएको छ । मद्रास इन्टरनेसनल सर्किटमा सुजन थापा मगरको जितले यस मार्गको उपलब्धि देखाएको कम्पनीले जनाएको छ ।
