काठमाडौं, जेठ १५ । गत वर्षको फागुन मसान्तसम्म डिम्याट (हितग्राही खाता) खाता लिने नागरिकको संख्या कुल जनसंख्याको २१.३ प्रतिशत पुगेको छ । फागुन मसान्तसम्म डिम्याट खाता ६२ लाख २४ हजार नेपालीमा पुगेको छ ।
सरकारले सार्वजनिक गरेको आर्थिक सर्वेक्षण २०८० ०८१ अनुसार पछिल्लो समय धितोपत्र बजारमा लगानीकर्ताको सहभागिता उत्साहजनक रूपमा बढेको छ । २०७९ असारसम्म ५३ लाख ४६ हजार डिम्याट खाता थियो ।
गत असार मसान्तसम्म करिब ८.९ प्रतिशतले बढेर ५८ लाख २३ हजार पुगेको छ । २०८० असार मसान्तसम्म करिब ४८ लाख २६ हजार रहेको मेरो शेयर खाताको संख्या पनि ५२ लाख ६४ हजार पुगेको छ । यो कुल जनसंख्याको १८.०३ प्रतिशत हो ।
फागुन मसान्तसम्ममा सबैभन्दा बढी लगानीकर्ता बागमतीमा ३७.२२ र सबैभन्दा कम कर्णालीमा २.४३ प्रतिशतमा डिम्याट खाता रहेको छ ।
कर्णाली प्रदेशमा १ लाख ५१ हजारमा डिम्याट खाता छ भने बागमतीमा २३ लाख १२ हजारमा डिम्याट खाता छ ।
डिम्याट खाता भनेको हो ?
अभौतिकीकरण गरिएका शेयर भण्डारण खोलिने खाता नै डिम्याट खाता हो । यसलाई हितग्राही खाता पनि भनिन्छ । हितग्राहीले सिडिएससिमा डिम्याट खाता खोल्नको लागि डिपी मार्फत् सम्पूर्ण विवरणहरू प्रणलीमा प्रविष्टि गरेपछि प्रणलीबाट उत्पन्न हुने १६ अङ्कको पृथक परिचय नै हितग्राही परिचय नम्बर हो । यसलाई नै डिम्याट नम्बर भनिन्छ ।
