काठमाडौं, साउन २३ । राष्ट्रिय स्तरका आठ विकास बैंकले गत आर्थिक वर्ष (आव)को चौथो त्रैमाससम्ममा रू. ५ अर्ब ५५ करोडभन्दा बढी नाफा कमाएका छन् । यो नाफा अघिल्लो आवको तुलनामा ९ दशमलव ३९ प्रतिशत बढी हो । सो आवमा यी कम्पनीहरूले रू. ५ अर्ब ७ करोड नाफा कमाएका थिए ।
गत आवमा कम्पनीहरूको नाफामा वृद्धि भएपनि लाभांश क्षमता भने घटेको छ । सो आवमा आठ कम्पनीमध्ये दुई कम्पनीको मात्रै लाभांश क्षमता बढेको छ, जसमा कामना सेवा विकास बैंक र गरिमा विकास बैंक छन् ।
तीमध्ये कामना सेवा विकास बैंकको लाभांश क्षमता सबैभन्दा बढी छ । यस कम्पनीको लाभांश क्षमता १० दशमलव ९१ प्रतिशत छ । यो अघिल्लो आवको तुलनामा बढी हो । अघिल्लो आवमा यस कम्पनीको लाभांश क्षमता १ दशमलव ६१ प्रतिशत थियो ।
गरिमा विकास बैंकको लाभांश क्षमता १० दशमलव ५२ प्रतिशत छ । अघिल्लो आवमा यस बैंकको लाभांश क्षमता ९ दशमलव ९८ प्रतिशत थियो ।
गत आवमा बाँकी ६ विकास बैंकको लाभांश क्षमता घटेको छ । तीमध्ये ज्योति विकास बैंकको लाभांश क्षमता ऋणात्मक छ ।
रकमका आधारमा नाफा सर्वाधिक कमाउनेमा मुक्तिनाथ विकास बैंक
आठ विकास बैंकमध्ये रकमका आधारमा सबैभन्दा बढी नाफा कमाउनेमा मुक्तिनाथ विकास बैंक छ । यस कम्पनीले गत आवको चौथो त्रैमाससम्ममा रू. १ अर्ब २७ करोड नाफा कमाएको छ । यो नाफा अघिल्लो आवको चौथो त्रैमासको तुलनामा २ दशमलव ४८ प्रतिशत हो । सो आवमा कम्पनीले रू. १ अर्ब २४ करोड नाफा कमाएको थियो ।
रकमका आधारमा सर्वाधिक नाफा कमाउनेको सूचीमा दोस्रोमा गरिमा विकास बैंक छ । यस बैंकले गत आवमा रू. १ अर्ब १३ करोड नाफा कमाएको छ । यो रकम अघिल्लो आवको तुलनामा १० प्रतिशत कम हो । अघिल्लो आवमा कम्पनीले रू. १ अर्ब २६ करोड नाफा कमाएको थियो ।
यी आठ कम्पनीमध्ये सबैभन्दा कम नाफा ज्योति विकास बैंकको छ । गत आवको चौथो त्रैमाससम्ममा यस कम्पनीले रू. २४ करोड ६५ लाख नाफा कमाएको छ । यो नाफा अघिल्लो आवको यसै अवधिको तुलनामा १८ दशमलव ३३ प्रतिशत कम हो । अघिल्लो आवमा कम्पनीले रू. ३० करोड १८ लाख नाफा कमाएको थियो ।
